ഏഷ്യയിലെയും യൂറേഷ്യയിലെയും  തന്നെ ഏറ്റവും വലിയ സൗന്ദര്യമത്സരമായ മിസ് ഏഷ്യ 2018 ന്റെ വിശേഷങ്ങളാണ് ഇക്കുറി കവർസ്റ്റോറിയിൽ വായനക്കാരുമായി പങ്കുവയ്ക്കുന്നത്. അറബിക്കടലിന്റെ റാണിയായ കൊച്ചിയിൽ നടന്ന ഈ മത്സരത്തിൽ മംഗോളിയൻ സുന്ദരി മിസ് ഏഷ്യ 2018 ആയും ഖസാക്കിസ്ഥാൻ സുന്ദരി മിസ് ഏഷ്യ ഗ്ലോബൽ 2018 ആയും തിരഞ്ഞെടുക്കപ്പെട്ടു

പണത്തെ പിന്തുടരുന്നത് നിർത്തുക, പകരം നിങ്ങളുടെ അഭിനിവേശം പിന്തുടരുക, പ്രമുഖ അമേരിക്കൻ ഇന്റർനെറ്റ് വ്യവസായിയും വെഞ്ച്വർ ക്യാപിറ്റൽ രംഗത്തെ വിദഗ്ധനുമായ ടോണി സീയയുടെ വാക്കുകളാണിത്.

ഈ ലക്കത്തിൽ ചൈനയിൽ സ്ഥിരതാമസക്കാരനായ കേരളത്തിൽ സീരിയൽ വ്യവസായസംരംഭങ്ങൾ നടത്തുന്ന  ജിതു സുകുമാരൻനായരെയാണ് ഞങ്ങൾ പരിചയപ്പെടുത്തുന്നത് . ജിതു ഒരിയ്ക്കലും പണത്തെയല്ല, പകരം തന്റെ അഭിനിവേശങ്ങളെയാണ് പിന്തുടർന്നത്. ഒരു ബഹുമുഖ വ്യക്തിത്വമായതിനാൽ, അദ്ദേഹം കപ്പൽ നിർമ്മാണം, ഭക്ഷണം, സിനിമ എന്നീ  കാര്യങ്ങളിൽ തൽപരനാണ്. അൾട്രാഡീപ് സബ്‌സീ എന്ന  സിംഗപ്പൂർ കമ്പനിയിൽ ഷിപ്ബിൽഡിംഗ് രംഗത്ത് ജനറൽ മാനേജരാണ് ഇദ്ദേഹം. കേരളത്തിൽ അഞ്ച് സബ് വേ അമേരിക്കൻ റെസ്റ്റൊറന്റുകൾ നടത്തുന്നു . ഷാൻ ഇ പഞ്ചാബ് എന്ന  പ്രമുഖ പഞ്ചാബ് റെസ്റ്റൊറന്റ് ശൃംഖലയുടെ കേരളത്തിൽ മാസ്റ്റർ ഫ്രാഞ്ചൈസി ജിതുവിനാണ്. രണ്ട് മലയാളം സിനിമകളും നിർമ്മിച്ചു. വെയ്‌ചെയ് എന്ന  ഇന്തോ-ചൈന സർക്കാർ ഉടമസ്ഥതയിലുള്ള കമ്പനിയുടെ ബിസിനസ് വികസനച്ചുമതല ജിതുവിനാണ്. ഏറെ ഊർജ്ജം പകരുന്ന  ഈ വിജയത്തിളക്കത്തിന്റെ കഥ വായിക്കാം.

തന്റെ സ്ഥിരം കോളത്തിൽ മണപ്പുറം ഫിനാൻസിന്റെ ചെയർമാനും മാനേജിംഗ് ഡയറക്ടറുമായ ഡോ .വി.പി. നന്ദകുമാർ ഐഎൽ ആന്റ് എഫ്എസ് പരാജയത്തിന്റെ പിന്നാമ്പുറക്കഥകളാണ് ചികയുന്നത്. ഒപ്പം സ്വർണ്ണവായ്പാ രംഗത്തെ എൻബിഎഫ്‌സി കമ്പനികളുടെ നേട്ടങ്ങളും അദ്ദേഹം പങ്കുവെക്കുന്നുണ്ട്. നോർത്ത് കൊറിയ എന്ന  അധികമാരും യാത്ര ചെയ്യാത്ത രാജ്യത്തെക്കുറിച്ചാണ് ഇക്കുറി യാത്രയിൽ. ഇരുമ്പുമറയുള്ള രാജ്യമാണിതെന്ന  ധാരണ തിരുത്തിക്കുറിക്കുന്നതാണ് ഇവിടുത്തെ അനുഭവങ്ങൾ. മഹീന്ദ്രയുടെ മരാസോയെ പരിചയപ്പെടുത്തുന്നു  ഓട്ടോയിൽ.

ഓഹരി വിപണി, സൗന്ദര്യം, പാചകം ,ബാങ്കിംഗ്, ചലച്ചിത്ര നിരൂപണം, പുസ്തക പരിചയം തുടങ്ങിയ സ്ഥിരം കോളങ്ങളും നിങ്ങളെ കാത്തിരിക്കുന്നു . ഈ ലക്കം നിങ്ങൾ തീർച്ചയായും ഇഷ്ടപ്പെടുമെന്ന്  വിശ്വാസത്തോടെ.

എഡിറ്റര്‍

നന്ദി
അജിത് രവി